#8

بعد ما قعدت كده مع نفسى وخدت واديت معاها فى الكلام توصلت لحاجه قد تحتمل الخطأ أكتر من انها تحتمل الصواب .. فيه 3 وظايف أى واحد لازم يختار ان يكون حاجه فيهم ..
1- وظيفة تجيب منها فلوس عشان تعيش وتفتح بيت .. وديه فى أغلب الأوقات بيبقى ليها علاقة بدراستك .. والغالب الأكبر انك مش هتحبها أوى
2- وظيفة انت بتحبها جدا ومستعد انك تشتغلها ومتخدش فلوس عليها ... وغالبا هى أصلا مش هتديك فلوس D: .. إن لم يكن هتصرف عليها .. 
3- وظيفة خيالية شوية نفسك تكون فيها ودي غالبا اللى كنت بتحلم بيها وانت صغير (تطلع القمر - تطير - بحار - قرصان - .... ) .. 

الموضوع بيبقى ماشى بتسلسل معين انك بتنقل من وظيفة لأخرى حسب طموحك انت .. تبدأ تشتغل بدراستك وبعدين تقرر انك عايز تشتغل الحاجه اللى بتحبها .. اللى بالمناسبة هيكون فيها من اللى انت حلمت بيه وانت صغير.
الفكرة بتبقى فى الوقت المناسب اللى تقرر فيه انك تعمل الحاجه اللى بتحبها ..

والأكثر حظا اللى يلاقى التلات وظايف فى وظيفة واحدة .. ولكن للأسف ليس كل ما يتمناه المرء يدركه :)