#2 عمرك أخدت بالك

كتير أوى والواحد مخنوق وشايل هم الدنيا كله فوق دماغه بيركز بعنيه فى حاجات عمره ما كان هياخد باله منها حتى لو كانت قدام عنيه

·       سائق أتوبيس .. راجل كمية فى التفاؤل .. خارجه من سكشن متأخر طبيعى جدا انى أنط فى أى أتوبيس يجى .. المشكلة مكنتش فى كمية الناس المتشعلقة فى الأتوبيس المشكلة انوا كان يوم الوقفه قبل العيد .. وبعد تفكير وتحليل الموقف قررت أن أقفز بداخل الأتوبيس .. ولك أن تتخيل .. الغريبة ان هذا السائق كان مبتسم جداا بيضحك وبيعاكس الناس بيهزر لدرجه ان الأتوبيس كله ضحك اتكلم فى السياسة اتكلم فى الكورة اتكلم عن مراته اللى مستحملاه .. بانت جدا الابتسامه على وجهه لما الأتوبيس كله بلا مقاطعة ضحك وقال كلمة حلوة أوى قال: أيوه كده اضحكوا عشان ربها يفكها من عندوا .

الناس نسيت همها نسيت انها محشورة ..المتشعلق نسى انوا متشعلق ..أنا نسيت حتى انى المفروض أنزل فى المحطة اللى جايه (بس الحمد لله جت سليمة).

تخيل شخص بسيط أثر فى ناس قد ايه وتخيل انت بابتسامه واحدة ممكن تعمل ايه!!!!!

·       وفى يوم تانى ونفس السيناريو فى عز البرد وأنا راجعة مش شايفة اللى قدامى ومستنيه انها تفرج .. يا أنسه لو سمحتى .. واذا بى ألتفت .. لقيت شاب جنب عربية موز ولا يملك غير يد واحده .. أفندم ..ممكن قلم أكتب بس بيه حاجه .. وسريعا بدون تفكير أعطيته الروترنج .. وكنت أراقبه من غير ما يحس .. والغريب انوا بعد ما كتب كان بيحاول أن يثبت بعض الموز فى سيخ حديد كان يوشك أن يقع ..ولا أعرف كيف نجح فى هذا وهو لا يملك غير يد واحده .. ولكن اذ فجأه استوعبت أن لديه ما هو أكبر .. لديه العزيمه والاصرار .. وبكل أدب شكرا على القلم .. وعجز لسانى عن القول له : انت من يستحق الشكر .

أيقنت تماما أن رغم أى شئ الا أننا نحمل ما لا نستطيع حمله .. تعلو ضحكاتنا ولكن بداخلنا نبحث عن من يداوى ألامنا ..

جايز ان الناس ديه مكنش متوقعة ان حد ممكن ياخد باله منهم ... بس اللى أنا متأكدة منوا انهم ناس تستحق أن ترفع لهم القبعة ..